Min sou ek weet dat daar na die vorige inskrywing nog ‘n wonderlike wit-verhaal aan die ontvou was. . .

Ons was vir ‘n paar dae Drakensberge toe en op 16 November, tydens die lente se laaste doodsnikke, het ons sneeu beleef!

Vroegoggend was daar ‘n missluier oor die berg gedrapeer. . .

Ons geduldige wag is later ryklik beloon met hierdie ongelooflike gesig. Die bergtoppe was spierwit, reinwit gekleed!

Ons kon nie ophou kyk nie! Soveel skoonheid is amper te veel om in te neem.

Die volgende woorde in verlede week se blog resoneer diep:

Kan jou hart se siel begryp na wie ek verlang? 
Dit is jy, my bruid in ewigheid.

Jesaja 54:10 Berge kan padgee, heuwels kan wankel, maar my liefde vir jou sal nooit verdwyn nie, my vredeverbond met jou sal nooit wankel nie, sê die Here, wat jou liefhet.

Hosea 2: 18-19 Ek gaan jou my bruid maak vir altyd. Ek gaan jou aan My bind deur my weldade en my goeie sorg, deur my liefde en my ontferming. Ek gaan jou aan My bind deur my onverbreekbare trou sodat jy aan My, die Here, toegewy sal wees.

Die berg met sy spierwit sneeu en die wolksluier herinner aan ‘n bruilof, onder ‘n hemelblou lug voltrek. . . Hoe kan U bruid dan anders as om U lof te bring, U lof te besing tot in die hoogste hemele?

Terug by die huis, kyk ek op en sien die wit wolke en die blou hemel. . . Die besef kom dat ‘n diep kyk daarna dieselfde waarheid tuisbring.

Dit wil voorkom asof ons soms ver moet reis om die skatte reg onder ons neuse (ook bo ons neuse!) raak te sien, te ontdek. . .

Hier is die wit jakarandablomme van naderby.

Die reinwit skoonheid daarvan lei na verskeie Skrifgedeeltes. . .

Die nou verband tussen wit en heiligheid is duidelik.

Prediker 9:8 Dra altyd wit klere, versorg jou hare met olie.

Jesaja 1:18 Kom tog, laat ons die saak met mekaar uitmaak, sê die Here: Al was julle skarlakenrooi van sonde, julle sal wit word soos sneeu. Al was julle purperrooi, julle sal wit word soos wol.

Matt 17:1-2 Ses dae later het Jesus vir Petrus en Jakobus en sy broer Johannes saamgeneem en hulle op ‘n hoë berg gebring waar hulle alleen was.  Daar het sy voorkoms voor hulle oë verander: sy gesig het begin straal soos die son, en sy klere het wit geword soos die lig.

Openbaring 3: 5 Elkeen wat die oorwinning behaal, sal sulke wit klere dra. Ek sal nooit sy naam uit die boek van die lewe uithaal nie, en Ek sal voor my Vader en voor sy engele verklaar dat hy aan My behoort.

Openbaring 7: 9-10 Hierna het ek ‘n groot menigte gesien wat niemand kon tel nie. Hulle was van elke nasie, stam, volk en taal en het voor die troon en voor die Lam gestaan. Hulle het wit klere aangehad, en daar was palmtakke in hulle hande. Hulle het hard uitgeroep: “Ons redding kom van ons God, wat op die troon sit, en van die Lam!”

Die volgende woorde uit die lied Sekelmaan van Retief Burger tref diep:

En mensekind ek weet jou hart is broos.
Want die twyfel trek jou skeef, en jy’s leeg en moedeloos. Maar as jy my oë vir ‘n oomblik sou kon leen, sou jy ‘n bruid sien in wit geklee.
En weet jy wie dit is?
Kan jou hart se siel begryp na wie ek verlang?
Dit is jy, my bruid in ewigheid.

Dis hoe God ons as gelowiges sien, spierwit gewas in Sy bloed as sy bruid tot in ewigheid en dit is die reine, heilige waarheid!

Terwyl ‘n geplukte takkie jakarandablomme dag vir dag my met hul asembenemende skoonheid deur die makrolens bekoor, herinner my seun my aan die wit jakarandas. Ek het skoon daarvan vergeet dat daar ‘n straat in Pretoria met wit jakarandas is.

Ek wil toe so graag ‘n wit jakarandatakkie hê!

 

My seun herinner my daaraan dat dit baie ou bome is en dat die takke veels te hoog vir my sal wees om by te kom.

Dit word ‘n gebed, ‘n begeerte van my hart, om hierdie blomme deur my makrolens te mag sien.

Die volgende woorde kom by my op:

Ps 37:4-5 Vind jou vreugde in die Here, en Hy sal jou gee wat jou hart begeer. Laat jou lewe aan die Here oor en vertrou op Hom; Hy sal sorg.

Here, ek vertrou op U.

So ry ek die straat af en die skoonheid van die bome is betowerend.

Na die kleurvolle, helderpers staan hulle in hul asemrowende skoonheid reinwit teen die blou lug. Die kontras tussen die wit blomme, die donker takke en die blou lug skep ‘n lewende kunswerk.

My seun was reg, die takke is te hoog vir my. Here, ek het feitlik al deur die hele straat beweeg. Hoe nou?

My oog gaan na die oorkant van die pad. Daar is twee mans besig om aan ‘n hek te werk en wat is daar by hulle? ‘n Leer! Ek loop oor die pad en rig my versoek aan hulle. Die een man knik met sy kop na die ander en beduie dat hy my mag help. Hy kom behulpsaam oor die pad, leer in sy hand, klim op en snoei-pluk maklik die klein takkie af!

Wetende dat hier iets groots aan die gebeur is, vra ek my weldoener sy naam: Godfrey. Later lees ek die betekenis van sy naam op: God’s vrede.

Dankie, Heer, dat U dit op hierdie dag beskik het dat ek weer moes leer om in alles op U te vertrou, in die klein en groot dinge.

U leer ook dat U vrede onder alle omstandighede, een van die grootste geskenke is wat U gee.

Al wat ons moet doen is om oor te gee en op U alleen te vertrou. U voorsien op die mees kreatiewe, verrassendste maniere!

Daagliks leer U ons deur ons lewe hoe om te lewe, U wat die weg, die waarheid en die lewe is.

(Volgende week wys ek die wit skoonhede van naderby.)