The real voyage of discovery consists not in seeking new landscapes, but in having new eyes. Marcel Proust

Ons was vir ‘n paar dae in ‘n wildtuin gewees. Om een of selfs meer van die groot vyf te sien, bly maar tog op ‘n mens se wenslys vir die dag. Die een dag, met een van ons ritte, is daar skielik baie motors en ons kon nie verby beweeg of iets sien nie. Met groot opgewondenheid sien ons later ‘n luiperd in die boom wat besig is om middagete te geniet. Die pad was ‘n hele entjie weg van die boom. 

Met die hulp van die telefotolens, kon mens hier en daar iets van die kenmerkende grootkatlyf raaksien. . .

Dis ‘n paar dae later, toe ek buite ons huisie sit, wat die klein kat my kom opsoek. Ons het mekaar vir die eerste keer gesien, maar hy het soos ‘n ou vriend homself naby my kom tuismaak en ons het net heerlik, in die stilte, bymekaar gesit en mekaar se geselskap geniet, die samesyn het later uitgeloop in ‘n sagte, rustige spin (syne natuurlik…). Ek dink myne het dieper gelê… Sou ek dit kon waag om die kamera te gaan haal om die oomblik vas te vang? Hier is wat hy besluit het:

Later besef ek dat ek hom baie meer geniet het as die luiperd, dat hy my hart aangeraak het deur my toe te laat om so naby hom te kom, my genoeg te vertrou daarvoor.

Deur die lens het sy skoonheid my diep aangeraak, hy is só volmaak. Stadig het daar iets na die oppervlak begin deurbreek. . . Hy is net soos ek geskape, aanmekaar verweef deur ‘n Meesterhand. Sy pels se kleur het my ook aangeraak. . .

Here, dankie vir U groot en klein verrassings elke dag. Vergewe my dat ek so dikwels na die “groot” dinge soek, terwyl die grootste rykdom in oënskynlik klein, onbenullige en alledaagse dinge lê. Soveel word oorgesien, misgekyk. U wil hê ons moet oor en van voor af sien… Dit verg nuwe oë.

U wil dit graag vir ons gee, maar ons moet daarvoor vra, besef dat ons blind is. Luk 18:40-41 Toe hy naby kom, vra Jesus vir hom: “Wat wil jy hê moet Ek vir jou doen?” En hy antwoord: “Here, dat ek kan sien.”

Oorsien

klein katjie, ek weet
ook jóú hare is getel
so ook jou dae
nes alle aardbewoners s’n . . .
daarom wil ek vandag vurig liefhê,
vlammend soos jou pels . . .
nie tyd verspil,
oral vertel, dit is uitgespel:
daar’s ‘n liefde wat brand en vlam,
onblusbaar
in die hartstogtelikste vuur

 

Joh 15: 5 “Ek is die wingerdstok, julle die lote. Wie in My bly en Ek in hom, dra baie vrugte, want sonder My kan julle niks doen nie.

Hier in die lente, waar daar oral nuwe lewe is, of aan die gebeur is, ervaar ek iets van Jes 43:19a Kyk, Ek gaan iets nuuts doen, dit staan op die punt om te gebeur, julle kan dit al sien kom. . .

Ons hou van nuwe dinge en gebeure, maar dit kan ook soms vrees meebring, vrees vir die onbekende, die onsekerheid oor wat gaan kom.

Hy weet dat die meegee vir ons soms soos ‘n lewenstryd  voel, maar die antwoord lê daarin om aan Hom verbind te bly en toe te laat dat Sy lewenskrag deur ons vloei. . . So berei Hy ons voor vir ons lewenstaak.

Joh 15: 8 My Vader word juis daardeur verheerlik dat julle baie vrugte dra en my dissipels is.”

Wolke is darem fassinerend! Dit bly nog altyd vir my ‘n vreugde om na wolke te kyk.

In die Woord is daar soveel verwysing na wolke. . .

Job 37:16 Weet jy hoe die wolke sweef? Dit is die wonderlike werk van Hom wie se kennis volmaak is.

 Ps 36:6 Here, u liefde reik tot in die hemel, u trou tot in die wolke,

 Ps 57: 11 want u liefde reik tot in die hemel, u trou tot in die wolke!

 Ps 68:5 Sing ‘n lied tot eer van God, sing tot eer van sy Naam, maak ‘n pad vir Hom wat op die wolke ry, en jubel voor Hom wie se Naam Here is.

 Ps 68: 35 Erken dat God magtig is! Hy heers oor Israel, Hy het mag oor die wolke!

 Ps 78: 14 Bedags het Hy hulle met ‘n wolk gelei, snags met die lig van ‘n vuur.

Ps 99:7 In ‘n wolkkolom het God met hulle gepraat, en hulle het sy voorskrifte gehoorsaam, die opdragte wat Hy hulle gegee het.

Ps 104:3b U wat op die wolke ry, op die vleuels van die wind,

Ps 147:8 Hy oordek die hemel met wolke, Hy voorsien reën vir die aarde en laat gras op die bergland uitspruit.

 Luk 9:34,35 Terwyl hy nog praat, kom daar ‘n wolk en gooi sy skaduwee oor hulle, en toe die wolk hulle insluit, het die dissipels bang geword. Daar kom toe ‘n stem uit die wolk wat sê: “Dit is my Seun wat Ek uitverkies het. Luister na Hom.”

Matt 24:30 “Dan sal die teken van die Seun van die mens in die hemelruim verskyn, en al die volke van die aarde sal verslae wees. Hulle sal die Seun van die mens op die wolke van die hemel sien kom met groot krag en majesteit.

 Matt 26:64 Jesus antwoord hom: “Dit is soos u sê. Daarby sê Ek vir julle:   “Van nou af sal julle die Seun van die mens sien waar Hy aan die regterhand sit van Hom wat magtig is, en julle sal Hom sien kom op die wolke van die hemel.” 

Markus 13: 26,27 “Dan sal die mense die Seun van die mens in die wolke sien kom met groot krag en majesteit. En dan sal Hy die engele uitstuur om sy uitverkorenes bymekaar te bring uit die vier windstreke, van die een kant van die aarde af tot by die ander kant.”

 Handelinge 1: 9-11 Nadat Hy dit gesê het, is Hy opgeneem terwyl hulle dit sien, en ‘n wolk het Hom weggeneem, sodat hulle Hom nie langer kon sien nie. Terwyl Hy weggaan en hulle nog stip na die hemel kyk, het daar skielik twee mans in wit klere by hulle gestaan. Dié sê toe vir hulle: “Galileërs, waarom staan julle so na die hemel en kyk? Hierdie Jesus wat van julle af na die hemel toe opgeneem is, sal net so terugkom soos julle Hom na die hemel toe sien opgaan het.”

 Openbaring 1:7,8 Kyk, Hy kom met die wolke, en al die mense sal Hom sien, ook hulle wat Hom deurboor het; en al die volke van die aarde sal oor Hom in selfverwyt weeklaag. Ja, dit is seker! “Ek is die Alfa en die Omega,” sê die Here God, Hy wat is en wat was en wat kom, die Almagtige.

As ek hierdie lees, dan ervaar ek wolke as simbole van onder andere:  Sy almag, wonderlike werke, voorsienigheid, volmaaktheid, nabyheid, sorg, trou, teenwoordigheid, hulp, misterie, belofte van sy wederkoms en bowenal sy liefde!

Hy, wat die wolke as rytuig gebruik, gaan ons eendag op die wolke ontmoet:

1 Tess 4:16-18 Wanneer die bevel gegee word en die stem van die aartsengel en die trompet van God weerklink, sal die Here self uit die hemel neerdaal. Allereers sal dié wat in Christus gesterf het, uit die dood opstaan; daarna sal ons wat nog lewe, saam met hulle op die wolke weggevoer word, die lug in, die Here tegemoet. En so sal ons altyd by die Here wees. Troos mekaar dan met hierdie woorde.

Dit is genoeg om elke dag my kop op te lig, dit gee my moed dat ons so gaan ontmoet. Met my voete op die aarde, slaan ek my oë op na sy wolke. . .

Hy gaan ons op wolke kom haal en daarom mag ons in die wolke wees omdat ons eendag op die wolke gaan wees! Wat ‘n reis!

Psalm 74:17 U wat al die seisoene van die aarde vasgestel het; somer en winter is die werk van u hand.

Die eerste woorde van ‘n ou volksliedjie, “dis heerlike lente, die winter’s verby”, kom in my op toe ek hierdie nuwe, nuutgebore skoonhede sien. Alhoewel daar ‘n yskoue windjie om my waai, het hierdie asemrowende amandelbloeisels hul boodskap baie duidelik in blommetaal gebring. Hulle is die eerste bome wat hul lentegewaad vertoon en so die nuwe lente aankondig, asof hul sê: kyk, sien, hier is die nuwe seisoen, hier is die bewys daarvan!

Hoop jy geniet hulle net soveel as wat ek dit geniet om hulle na jou te bring.

 

Littekens

die dor boom
het in die volheid van tyd
deurweek van die nuwe seisoen
in volle bloei gestaan . . .
nuwe lewe het deurgebreek, aangebreek

Gebed: Dankie Here, dat ons kan glo: daar is altyd ‘n nuwe lente, ‘n nuwe lewe, wat na ‘n winter aanbreek, in die natuur en ook in ons lewens.

Lukas 12:27 ”Kyk na die veldblomme – hoe hulle groei! Hulle swoeg nie en hulle spin nie. Maar Ek sê vir julle, selfs Salomo in al sy prag was nie soos een van hulle geklee nie.

Die skoonheid van die perdeblomme  (dandelions) een oggend vroeg, so met die dou daarop, het my diep aangeraak.

Dou is soveel keer in die Bybel ‘n simbool van Sy seën en sorg. ‘n Paar skrifgedeeltes: Genesis 27:28 – God gee aan jou dou uit die hemel, Numeri 11:9 – Die manna het snags saam met die dou by die kamp geval., Deut 33:13 Mag sy land deur die Here geseën word: met die beste uit die hemel, met dou.

Doublom

perdeblom, o veldblom
geen swoeg, geen sweet
swierig, in spierwit gekleed
met bruidsjuweel getooi:
skitterend, glansryk die kraalwerk
U handewerk
veelvoudig die seën, trou:
die blomsorg, hemelse dou

ons, so sorg-gevul
terwyl U sorgvuldig sorg

Luke 12:28 (MSG) If God gives such attention to the wildflowers, most of them never even seen, don’t you think he’ll attend to you, take pride in you, do his best for you?