Category Archives: Bewustheid

Hosea 11:8 My liefde brand te sterk.

 

Die afgelope Saterdag het ek vir die dag ‘n stilteretreat bygewoon.

Buite, in die stil ure, sien ek toe die vure:

Dit het my so laat besef Hy het deur alle tye heen nog altyd Sy vurige liefde aan die mensdom bewys. Die hoogtepunt daarvan was aan die kruis en later in die vuurtonge met die uitstorting van die Heilige Gees.

Catherine van Siena het geskryf: You are the fire, nothing but a fire of love, crazy over what You have made.

Gebed: Heer, kom brand in ons harte, vul ons en elke uur van ons lewe met U heilige vuur.

So word U vurige liefdeshart oral op aarde sigbaar . . .

Ps 34:8 O taste and see that the LORD is good . . .

“Die retreatnaweek is op hande en ons is so te sê gereed vir jul aankoms. Ek moet nog net gaan kappertjies pluk vir die kamers en die verwarmers aanskakel.”

Die epos-boodskap hierbo enkele dae voor die retreat moes alreeds ‘n aanduiding gegee het van wat sou kom. . .

Alles was toe 100% gereed met ons aankoms by die Restory retreatsentrum vir ‘n fotografieretreat. Ons is met ope arms en harte verwelkom. Toe ek in my kamer kom, val my oog dadelik op die kappertjies in die blompot.  Hulle het my kamer opgevrolik met hul intense, helder kleure. Die landskap daar buite was wintervaal en die wind geniepsig koud. Die warmte van die verwarmer en die kappertjies het my dadelik so welkom, so tuis, laat voel.

Die volgende oggend kry ons die opdrag om iets te gaan afneem, of liewer, te gaan sit en te ontvang wat na ons toe kom, dan ‘n foto daarvan te neem.

Toe ek in my kamer kom om my kamera te kry, val my oog weer op die vrolike kappertjies in die blompot. Ek kyk lank en stil daarna en besef dis wat ek nou ontvang: ek ervaar Sy goedheid, Sy sorg, in hulle. Die lens skuif tussen my en hulle in en hul dieper skoonheid word vasgevang, gestoor in my kamera asook in my.

Met middagete sit ek een van die kappertjieblomme uit die slaai op my bord. Bewustelik, stil het ek daarna gekyk, dit geëet en die bevestiging dat Hy goed is, selfs op my tong gevoel. . . Die kappertjieblom het my laat sien en laat proe dat Hy goed is!

Gebed: Heer, laat ons asseblief kappertjiekleur en -warmte in ‘n koue, harde en soms ongenaakbare wêreld bring.

Later sien ek die sonnetjie en sy strale op die kapperblaar en ek weet dat Hy ons uitnooi om Sý lig uit te straal net daar waar ons is en só dalk iemand se winter ophelder . . .

Hierdie boom-mens-kyk oefening raak maar net nie vir my afgesaag nie . . .

Dit word vir my al duideliker dat dit vir Jesus baie belangrik is dat ons reg moet sien:

In Matt 6:22b-23 lees ons: Jou oë is soos ’n lig. As jy op die regte manier daarmee kyk, maak dit alles in jou lewe helder. Maar as jy jou oë nie deur God laat instel nie, maak jou oë jou hele lewe pikdonker. As daar geen goddelike lig in jou lewe skyn nie, is dit regtig nag binne-in jou.

Verder ook sê Jesus: Matt 7:1 “Moenie oordeel nie” en verder in Matt 7:5 “Huigelaar! Haal eers die balk uit jou eie oog uit, dan sal jy goed kan sien om die splinter uit jou broer se oog uit te haal.”, het vir my ‘n dieper, ryker betekenis.

In die Markus 8 word beskryf hoe Jesus ‘n blinde man genees, maar in twee stappe. Die man sien eers mense, iets soos bome.

Dit is ‘n gedeeltelike sien, hierdie boom-mens-sien, maar Jesus wil ons ten volle laat sien. Daarna genees Jesus hom heeltemal en hy alles toe duidelik gesien.

Gebed: Jesus, U het gesê dat as ons oog goed is, sal ons hele liggaam lig hê. Genees asseblief ons swaksiende oë soos net U kan. Dan sal ons lig sien, lig wees. . . Dan sal ons nie mense regsien nie, maar reg sien!

 

Gen 1:31a Toe het God gekyk na alles wat Hy gemaak het, en dit was baie goed.

Iemand het ‘n rukkie gelede vir my ‘n papier gegee met ‘n paar wyse woorde van Ram Dass daarop. Die boodskap daarin was hoe verskillend ons na bome en na mense kyk.

Dit het ‘n saadjie in my gesaai . . . Ek het ‘n paar bome van naderby gaan bekyk:

Sou ek die volgende kommentare oor die bome hierbo lewer?

“Sjoe, jy is darem so bleek, vol vlekke, boonop ‘n hemelbesem…”

“Jy groei darem vreeslik skeef.”

“Jy is darem so oordadig bont aangetrek vandag!”

Sou ek so gedink het? Ek glo nie, dis eintlik bietjie absurd om so te reageer. . .

Toe ek na die bome gekyk het, by hulle stilgestaan het, het ek elkeen se eiesoortige skoonheid, uniekheid waardeer. Elke boom het ek geniet net soos dit is. Ek het dadelik besef dat wanneer ek na mense kyk, ek heeltemal anders kyk, dikwels krities en veroordelend.

Tog lees ons dat God bome, mense, álles goed gemaak het.

Toe oefen ek die afgelope week die boom-mens-kyk in. Dit was ‘n ongelooflike ervaring! Weet jy hoe interessant dit is om op hierdie manier na mense te kyk?! Om bloot mense te aanvaar net soos wat hulle is en hulle uniekheid, eiesoortige skoonheid raak te sien en te waardeer.

Gebed: Here, ek bely dat ek baie keer na die kroon van U skepping kyk met ‘n kritiese oog, terwyl U woord sê dat U alles baie goed gemaak het. Laat my in liefde gewortel en gegrondves leef, dat ek met U liefdesoë kyk na al die wonderlike verskeidenheid mense in die lewenswoud. Herinner my aan U woord wat sê dat ons almal van U afstam. Ek glo ek sal dan iets begin ervaar van Paulus se woorde in Romeine 15:7 – Aanvaar mekaar dan, soos Christus julle ook aanvaar het, tot eer van God.

Handelinge  2:1-4  Toe die dag van die pinksterfees aanbreek, was hulle almal op een plek bymekaar. Skielik was daar ‘n geluid uit die hemel soos van ‘n geweldige stormwind, en dit het die hele vertrek gevul waar hulle gesit het. Hulle het iets soos vuur gesien wat in tonge verdeel en op elkeen van hulle gekom het. Almal is met die Heilige Gees vervul en hulle het in ander tale begin praat soos die Heilige Gees dit aan hulle gegee het om onder sy leiding te doen.

Toe ek onlangs hierdie gedeelte lees, plaas ek myself tussen die dissipels en in my verbeelding ervaar ek die gebeure saam met hulle. Saam beleef ek eers die wind en toe die vuur. . . God is onkeerbaar in sy vurige, verterende liefde en verlange!

Toe ek ‘n rukkie later buite loop,  sien ek dit raak: die wind wat nogal sterk waai.

Toe begin ek die vuur oral raak te sien in die kleur van die herfsblare, selfs vuurtonge!

Gebed: Dankie Heer dat U ook met die alledaagse ons aan U geestelike waarhede herinner. Laat my asseblief U verlange, U grenslose liefde, wat so vúrig is, in elke herfskleur ervaar.  Ek begeer U, u vuurtong op my, ín my. Waai deur ons, Geeswind, sodat U vlam in ons vol passie sal brand en aansteeklik sal wees!

Vandag vier ons Hemelvaartdag. Handelinge 2:9-11 Nadat Hy dit gesê het, is Hy opgeneem terwyl hulle dit sien, en ‘n wolk het Hom weggeneem, sodat hulle Hom nie langer kon sien nie. Terwyl Hy weggaan en hulle nog stip na die hemel kyk, het daar skielik twee mans in wit klere by hulle gestaan. Dié sê toe vir hulle: “Galileërs, waarom staan julle so na die hemel en kyk? Hierdie Jesus wat van julle af na die hemel toe opgeneem is, sal net so terugkom soos julle Hom na die hemel toe sien opgaan het.”

Dit moes darem ‘n asemrowende gesig vir die dissipels gewees het om Jesus te sien opgaan so saam met die wolk! Verder en hoër het Jesus voor hulle oë opgegaan en weggegaan totdat Hy seker net stippelgroot geraak en toe uit hul gesigveld verdwyn het. Toe is daar boonop die twee engele wat vir hulle vertel dat Jesus weer net so gaan terugkom.

Hulle was seker die hele dag in die wolke gewees . . . Dit word beskryf in Lukas 24 dat hulle met groot blydskap teruggegaan en God geprys het.

Gebed: Dankie Here, dat ons vandag weet dat U wel weggegaan het, maar dat U belofte vervul is soos geskryf is in Joh 14:16 “En Ek sal die Vader bid, en Hy sal julle ’n ander Trooster gee om by julle te bly tot in ewigheid”  en so het U teruggekom om nog nader te kom.