Dit eindig nie in ‘n punt nie.

by ⋅ Leave a Comment

Jes 43:19 Kyk, Ek gaan iets nuuts doen, dit staan op die punt om te gebeur, julle kan dit al sien kom;

‘n Bietjie meer as ‘n maand gelede kom help my skoonsus en swaer ons om ons oorgroeide tuin in toom te probeer kry.  ‘n Woeste snoeiproses volg. . .

Dit blyk so genadeloos te wees en veral die Yucca-plante het erg deurgeloop:

Ek moes my skoonsus, wat vertroud is met snoeiwerk, vertrou dat hul weer sou groei, hoewel alle tekens die afgelope maand die teendeel gewys het. Soos geamputeerde ledemate het hul opwaarts gewys. . .

Ongeveer 40 dae later sien ek die eerste tekens van nuwe lewe: hulle pryk triomfantelik omhoog!

Nuwe lewe is altyd aan die deurbreek, in onsigbare donker. Ons moet net die Tuinier vertrou, ook wanneer Hy sy snoeiwerk doen.

Onder Sy hande is daar nie iets soos ‘n punt, ‘n “full stop”, ‘n einde nie, maar wel ‘n nuwe begin, ‘n nuwe groeiproses wat net Hy kan bewerk.

2 Korintiërs 5:17,18 Iemand wat aan Christus behoort, is ‘n nuwe mens. Die oue is verby, die nuwe het gekom. Dit alles is die werk van God

Ons deel is om Sy prosesse te bly vertrou en Hom te vra om ons te help om te bly glo en om geduldig te wag:

Jeremia 29:11 Ek weet wat Ek vir julle beplan, sê die Here: voorspoed en nie teenspoed nie; Ek wil vir julle ‘n toekoms gee, ‘n verwagting!

Dié nuwe blaartjie herinner aan ‘n komma wanneer die foto omgedraai word:

By Hom is dit altyd ‘n komma, nie ‘n punt nie!

¡uǝᴉs ǝʇ ƃǝɹ ɯo ʞʎʞ oqǝʇsɹǝpuo suǝɯ ʇǝoɯ sɯos ʎɯ ʞʎ˥

Dit is die grootste punt vir ons om te begryp: ‘n nuwe manier van kyk, van sien, word gevra. . .

Dié proses is toe ‘n groeiproses, ‘n genadeproses, wat uitloop op ‘n groter lewe. . .

Daar is áltyd die belofte van groei in die teenwoordigheid van Sy lig, al voel ons ook hoe afgestomp en verwond. . .

Ons kan daarin glo en daarop hoop want ons wéét Lydenstyd loop altyd uit, lei na Opstandingsondag!

Johannes 11:25-26 Toe sê Jesus vir haar: “Ek is die opstanding en die lewe. Wie in My glo, sal lewe, al sterwe hy ook; en elkeen wat lewe en in My glo, sal in alle ewigheid nooit sterwe nie. Glo jy dit?”

‘n Hartsverandering gevra.

by ⋅ Leave a Comment

Lukas 10:33-34 Maar ‘n Samaritaan wat op reis was, het op hom afgekom, en toe hy hom sien, het hy hom innig jammer gekry. Hy het na hom toe gegaan, sy wonde met olie en wyn behandel en hulle verbind.

Vandag se bloginskrywing speel ook by ons huis af, hierdie keer sommer in die kombuis. . .

 

Om jou nuuskierigheid te prikkel:

Wat was hier onder my lens?

Twee dae gelede waarsku my seun my dat daar ‘n geitjie in die kombuis is en dat ek versigtig daar moet trap. Toe ek in die kombuis kom, het ek totaal daarvan vergeet en terwyl ek effens haastig is, sien ek iets soos ‘n “vuil kol” op die vloer. Ek kyk van naderby en sien toe dat dit ‘n piepklein, stertlose geitjie is. So byna het ek dit onwetend raakgetrap! Hy is so klein en weerloos. . .

Versigtig plaas ek ‘n trappie daaroor sodat niemand op hom trap nie.

As dit nou is waar hy wil wees, nou wil skuil, laat hy dan daar bly. Die arme geitjie moes verskriklik geskrik het om sy stert te verloor en wou seker hier herstel. . .

Dis nou Lydenstyd waar ons opnuut uitgedaag word om selfondersoek in te stel en toe te laat dat ons harte getransformeer word.

Joel 2:12 “‘And yet even now,’ says the Lord, ‘return to me with all your heart . . .’”

✝ransformeer

U kruis hard
U hart sag
my kruis sag
my hart hard

Here, U weet dat alleenlik ‘n hartomkeer ons lewens handomkeer sal verander.

Sagte harte lei tot sagte oë, hande en voete. . . So word ons U liggaam hier op aarde.

Dan sal ons vir mekaar veilige ruimtes skep om tot rus en heelwording te kom; dis hoe u Ligkoninkryk grondvat. . .

Lukas 10:37 Toe sê Jesus vir hom: “Gaan maak jy ook so.”

Laat ons luister wat die lyster vir ons fluister (3).

by ⋅ 1 Comment

Ons tuin-inwonende lyster se verhaal gaan steeds voort. . .

Op 13 Januarie vanjaar, verskyn sy weer voor my lens. Dit beteken sy woon alreeds vir ‘n bietjie meer as ses jaar hier by ons! In voëljare moet sy seker al baie oud wees. . .

Sy draai haar kop na my.

Kort daarna staan sy en pryk met hierdie sappige grasvonds. . .

So deur al hierdie jare heen was daar vir haar baie voedselskatte in ons tuin en dit terwyl sy kon oorleef te midde van verskeie besoekerskatte. . .

Matt 6:26 Kyk ’n slag na die voëls: hulle het nie groot skure waarin hulle elke dag hulle kos bêre nie. Tog is hulle nooit honger nie. God sorg dat hulle elke dag genoeg het om te eet. Weet julle, julle is baie meer werd vir God as al die voëls in die hemel.

Hoe op aarde weet ek dat dit dieselfde lyster is?

Hier is dit:

Sy het al van 2011 af al net een been gehad! Dit maak haar so ekstra spesiaal. . .

Here, U sorg vir hierdie eenbeen geelbeklyster al vir meer as ses jaar, reg onder ons neuse en oë. Met haar gestremdheid en al oorleef sy, floreer sy en bekoor sy ons boonop daagliks met haar pragtige, kenmerkende lysterklanke. . .

Wat fluister sy? Ek spits my hartsore. . . “As God so mooi vir my sorg, hoeveel te meer sorg Hy nie vir julle nie?”

Petrus beskryf dit so – 1 Petrus 5:7 Werp al julle bekommernisse op Hom, want Hy sorg vir julle.

Laat ons luister wat die lyster vir ons fluister (2).

by ⋅ Leave a Comment

Psalm 74:17 U wat al die seisoene van die aarde vasgestel het; somer en winter is die werk van u hand.

Hierdie foto van dieselfde lyster is vier jaar later geneem, op 21 Desember 2015, waar sy op dieselfde muur staan.

Lyk my selfs lysters word ook grys. . .

When you really gaze at something, you bring it inside you. John O’Donohu

Hierdie foto ontlok soveel emosie binne mens. Dit is somer, tog het die grys agtergrond ‘n winteratmosfeer. Sy staan nou alleen op die muur (vergelyk dit met verlede week se foto).

We don’t see things as they are, we see them as we are. Anais Nin

M. Scott Peck se woorde uit sy boek The Road Less Travelled kom by my op: LIFE IS DIFFICULT. This is a great truth, one of the greatest truths. It is a great truth because once we truly see this truth, we transcend it. Once we truly know that life is difficult – once we truly understand and accept it – then life is no longer difficult. Because once it is accepted, the fact that life is difficult no longer matters.

Aanvaarding is vir my die sleutel wat die deur na ‘n groter lewe oopsluit; ‘n diep ja, vir wat ook al oor ons pad kom, omdat ons ‘n diep vertroue, anderkant rede het, want ons weet in Wie se hand ook hierdie seisoen is, maak nie saak wat gebeur nie. Daar is altyd ‘n groter plan, egter dikwels nog versteek vir ons, wat aan die werk is . . .

Dit laat my ook dink aan die Prediker se woorde:

Pred 3:1-11  Elke ding het sy vaste tyd, elke ding in hierdie wêreld het sy tyd:  daar is ‘n tyd om gebore te word, ‘n tyd om te sterwe, ‘n tyd om te plant, ‘n tyd om plante uit te trek, ‘n tyd om ‘n lewe te neem, ‘n tyd om ‘n lewe te red, ‘n tyd om af te breek, ‘n tyd om te bou, ‘n tyd om te huil, ‘n tyd om te lag, ‘n tyd om te treur, ‘n tyd om van blydskap te dans,  ‘n tyd om klippe weg te gooi, ‘n tyd om hulle bymekaar te maak, ‘n tyd om te omhels, ‘n tyd om weg te bly van omhelsing af,  ‘n tyd om aan te skaf, ‘n tyd om te laat wegraak, ‘n tyd om te spaar, ‘n tyd om weg te gooi, ‘n tyd om te skeur, ‘n tyd om toe te werk, ‘n tyd om stil te bly, ‘n tyd om te praat, ‘n tyd om lief te hê, ‘n tyd om te haat, ‘n tyd vir oorlog, ‘n tyd vir vrede.  Wat kry die mens vir die werk waarmee hy hom vermoei? Ek het gesien dat God aan die mens ‘n taak gegee het om hom mee besig te hou.  God het elke ding gemaak dat dit pas in ‘n bepaalde tyd, maar Hy het ook aan die mens ‘n besef gegee van die onbepaalde tyd. Tog kan die mens die werk van God van begin tot einde nie begryp nie.

Dankie Heer, vir elke seisoen in ons lewens. U is altyd op pad saam met ons, elke oomblik van ons lewens. Help ons tydens elke seisoen om nog nader aan U te groei en versterk anderkant uit te kom. U wil ons verander om soos U te sien, om al meer soos U te word.

Ps 32:10b Maar wie op die Here vertrou, dié omvou Hy met sy liefde.

Is dit nie juis wanneer ons totaal magteloos is dat ons onverklaarbaar wéét dat hierdie omvouende Vlerke so oneindiglik sterk, maar terselfdertyd ook so mateloos sag is nie?

(Indien julle dalk wonder hoe ek weet dat dit dieselfde lyster is, kyk baie fyn. . . Volgende week vertel ek meer.)

Laat ons luister wat die lyster vir ons fluister (1).

by ⋅ 2 Comments

Sommige stories vra mos maar net om vertel te word, en hierdie storie is een van hulle. Dit kon iewers in ‘n rivierbos of in die wye Karoo afgespeel het, maar ons voorstedelike tuin is verkies. Die storie het alreeds in 2011 begin. . .

Op 30 November daardie jaar was hierdie tweetjies op ons grensmuur en het hulle lank genoeg stil bly sit sodat ek ‘n foto van hul kon neem. Hierdie foto bêre ek alreeds van toe af. Dalk het ek intuïtief aangevoel dat hier ‘n storie aan die ontvou was. . .

Dit was Ma en kind geelbeklyster (Engels: Karoo Thrush). Eintlik was die jongeling toe eerder nog “grysbeklyster”. Hierdie foto het my diep aangeraak en laat mens se hart sommer warm klop. Dis asof mens die band tussen ma en kind kan ervaar, selfs hier in die voëlryk.

Sy pryk in herhalende geel: bek, been en oogring, terwyl die jongeling s’n vir eers nog grys is. Dit sou later vergeel.

Hul vere is so pragtig, Ma-lyster s’n is netjies, perfek. Die kleintjie s’n lyk effens onnet, tog kan mens sommer die donssagtheid van die jong veertjies ervaar.  Was hierdie dalk ‘n spesiale Ma en kind uitstappie?

Dis somer en die groen bome vorm ‘n sagte agtergrond vir hierdie tafereel. Dis ‘n groeiseisoen. . .

Die volgende twee Skrifgedeeltes kom op:

Matt 6:26 Kyk ’n slag na die voëls: hulle het nie groot skure waarin hulle elke dag hulle kos bêre nie. Tog is hulle nooit honger nie. God sorg dat hulle elke dag genoeg het om te eet. Weet julle, julle is baie meer werd vir God as al die voëls in die hemel.

Psalm 91:4 Hy sal jou oordek met sy vlerke, en onder sy vleuels sal jy skuil; sy trou sal jou beskerm soos ’n skild.

Mag dit ons gemotiveerd laat voel om ons lewe vry en voluit te leef as u kinders; geliefd, kosbaar, gekoester, beskerm en versorg in alle opsigte!

So gebruik U u geveerdes vandag nog om vir ons spesiale boodskappe te bring. . .

Volgende week vertel ek verder.

Seënblomme

by ⋅ 2 Comments

Jesaja 35:2 Ja, daar sal ’n oorvloed wees van blomme, en ’n gejuig en gesing!

As ‘n mens maar één van God se volmaakte blomme moes maak, sou dit ‘n leeftyd geneem het. William Blake

Blomme is die poësie van die aarde, soos sterre die poësie van die hemel is. Anoniem

Wesens van ‘n planeet waar daar nie blomme is nie, moet seker dink ons aardbewoners is mal van vreugde om soveel skoonheid rondom ons te hê. Iris Murdoch

In vreugde of in smart is blomme ons getroue vriende. Kokuzo Okakura

Blomme is ‘n groot seëning, want die Here het ‘n ruikertjie gemaak in die veld met sy dissipels en Hy het gepreek oor die lelie; want daar is geen hoogte waar daar nie blomme is nie. Blomme is ‘n groot seëning vir al die sintuie. Christopher Smart

Here, mag ons ook in ‘n wêreld wat smag na seën, U blomme wees wat seën bring vir almal om ons.

Dis slegs U nabyheid en seën wat ons daartoe in staat stel. . .

Welkom, welkom, welkom. . .

by ⋅ Leave a Comment

Iemand het eenkeer gesê dat hierdie gebed die wreedste gebed is wat ‘n mens kan bid:

Welcoming Prayer – Thomas Keating

Welcome, welcome, welcome.
I welcome everything that comes to me today
because I know it’s for my healing.
I welcome all thoughts, feelings, emotions, persons, situations and conditions.
I let go of my desire for power and control.
I let go of my desire for affection, esteem, approval and pleasure.
I let go of my desire for survival and security.
I let go of my desire to change any situation, condition, person or myself.
I open to the love and presence of God and God’s action within.
Amen 

Dit voel dikwels na ‘n groot verlies om soveel te laat gaan en dis gewoonlik baie moeilik.

Dalk is een van die grootste redes daarvoor dat “Most people prefer the certainty of misery to the misery of uncertainty.” Virginia Satir

Tog is dit een van die mees bevrydende gebede. . .

Dit maak ‘n mens vry en onaantasbaar. Dis egter ‘n lewenslange proses. Ek glo dat dit van onskatbare waarde kan wees om hierdie gebed elke dag te bid, nie net gedurende ons stiltetyd nie, maar ook oor en oor soos wat die lewe met ons gebeur.

In Johannes 8:32 sê Jesus: en julle sal die waarheid ken, en die waarheid sal julle vry maak.”

Die uitlewing van hierdie gebed laat mens ervaar hoe elke bietjie sterf aan self én oorgee aan Hom mens net ligter en ligter maak.  Dan volg die vreugdevolle uitroep: Welkom, welkom, welkom, vryheid!

Galasiërs 5:1 Christus het ons vry gemaak om werklik vry te wees. Staan dan vas in hierdie vryheid en moet julle nie weer onder ‘n slawejuk laat indwing nie.

Ek sal my nie haas nie, want ek is ‘n skaap. . .

by ⋅ 1 Comment

Psalm 23, Die Here is my herder, is heel waarskynlik die bekendste psalm en is seker dié een wat die meeste van ons van vroegs af al ken. Hierdie vrye vertaling, oorspronklik in Japanees, is so pragtig:

 

 

 

Die Here stel my pas vas – ek sal nie haas nie.
Hy laat my tot stilstand kom vir rustige oomblikke.

Hy voorsien my van beelde van stilte
wat die vrede in my herstel.


Hy lei my in weë van bevoegdheid
deur kalmte van gees.
Hy rig my na vrede.


Al het ek baie dinge om elke dag te doen,
sal ek nie paniekerig word nie,
want sy teenwoordigheid is in my.
Sy ewigheid, sy almag hou my in balans.


U berei vir my verfrissing en vernuwing
te midde van al my aktiwiteite.


U salf my gedagtes met olie van rustigheid.
My beker van vreugdevolle energie loop oor.

Net harmonie en doeltreffendheid sal vrugte wees van al my ure.
Want ek sal in pas wees met my Here
En in sy huis vertoef vir ewig.

Lyk vir my dis vir ons haas onmoontlik om nie haastig te leef nie. Here, help ons asseblief om onsself gereeld te plaas in stille rustigheid voor U. Laat ons soms die pas markeer en in afwagting stil voor U te raak, en so in pas te kom met die rustige, uitnodigende fluister binne ons.

So sal Sy vrede en rustigheid ons lewens deurdring, selfs tydens ons alledaagse take, in pas met ons Herder se lewensritme. . .

Daarom sal ek my nie haas nie, want ek is ‘n skaap van Sy kudde!

Laat ons oefen!

by ⋅ 1 Comment

So aan die begin van ‘n nuwe jaar is daar soveel van ons wat met hernieude ywer weer oefen na ‘n vakansierus of selfs dalk van nuuts af begin oefen. Ons het soms wonderlike nuwejaarsvoornemens. . .

Daar is egter ‘n ander manier van oefen wat eeue oud is, eintlik ‘n tydlose oefening, maar dis steeds die beste oefening ooit, want dit het ewigheidswaarde!

…everything faded, thinned to nothing, beside the light which bathed and warmed, the Presence your being had opened to. Where it shone, there life was, and abundantly; it touched your dullest task, and the task was easy. Joyful, absorbed, you ‘practiced the presence of God’ as a musician practices hour after hour his art: ‘A stone before the carver,’ you ‘entered into yourself.’ – Denise Levertov skryf só oor Br Lawrence (1614-1691)

St Teresa van Avila (1515-1582) se woorde inspireer vandag nog:

God alone is enough.
Let nothing upset you,
let nothing startle you.
All things pass;
God does not change.
Patience wins
all it seeks.
Whoever has God
lacks nothing:
God alone is enough

Br Lawrence skryf self: “If I were to be responsible for guiding souls, I would urge everyone to be aware of God’s constant presence, if for no other reason than His presence is a delight to our souls and spirit.”

Hierdie gedissiplineerde inoefening bring ongekende vreugde!

Hy wag vir ons, Hy wil ons naby Hom hê. Daar is egter ‘n probleem: ons beweeg soms in die teenoorgestelde rigting! Meister Eckhart beskryf dit so: “God is at home, it’s we who have gone out for a walk.”

In Gebed begin Koos du Plessis met die woorde: Laat my nooit die grond verlaat nie, laat my in U skadu bly…

Die laaste reëls is: eint’lik smag ek na U waters van rus, lei my Heer vanaand daarheen.

So: in hierdie nuwe jaar moet ons nie toelaat dat enige iets ons van koers af of van stryk bring nie, laat ons in die regte koers bly loop. Laat ons opstaan en aanstryk, al voel dit asof ons gedurig struikel en val. Hy bly ons geduldig lei, sy liefdevolle arms bly altyd oop, Hy wag ons in by Sy waters van rus. . . Hy weet ons raak so gou moeg. Hy alleen is genoeg!

1 Kron 16:11b (Die Boodskap) Moenie dat daar ’n dag verbygaan dat julle nie naby Hom is nie. In die Nuwe Lewende Vertaling is dit so vertaal: Hou aan om Hom te soek.

So bied U vir ons 365 nuwe oefengeleenthede om tuis te kom. . .

Vernuwingslig

by ⋅ Leave a Comment

Kersdag is so pas verby, waar ons opnuut ervaar het hoe U alles nuut kom maak het.

Nou is ons aan die vooraand van ‘n nuwe jaar.

U wil altyd vernuwing bring. . . U plan is altyd ‘n groeiplan.

Ons lees in Openbaring 21:5 – Toe sê Hy wat op die troon sit: “Kyk, Ek maak alles nuut.” En daarna sê Hy: “Skryf hierdie woorde op, want hulle is betroubaar en waar.”

Hierdie belofte het die vermoë om mens se hart en gemoed te lig, te vernuwe.

Maar wat gemaak indien mens nie nou eintlik vernuwing ervaar nie? Wat as die wêreld om mens donker lyk?

So ‘n rukkie gelede besoek ek iemand in die hospitaal wat met kanker gediagnoseer is en chemoterapie in die nuwe jaar moet ondergaan.

Wat ‘n belewenis was dit om haar te besoek. . . Ten spyte van moeilike omstandighede ervaar ek iets heiligs. Dis wanneer mens in haar oë kyk, dat mens dit sien: Lig.

Lukas 11:34 Die lamp van jou liggaam is die oog. As jou oog goed is, is jou hele liggaam ook verlig. Maar as jou oog sleg is, is jou hele liggaam ook sonder lig.

Rumi skryf:

The light which shines in the eye
is really the light of the heart..
The light which fills the heart
is the light of God, which is pure
and separate from the light of intellect and sense…

Hoe totaal anders lyk hierdie mosaïekwerk in die lig:

Hoe totaal anders lyk enige situasie wanneer U lig daarop skyn!

Here, ons begeer nuwe harte. Skyn asseblief U lig daarop, want dis daar waar ons die onsienlike kan sien en ‘n dieper, wonderlike werklikheid ervaar. Ons wag met biddende harte voor U daarvoor.

Johannes 8:12 Op ‘n ander keer het Jesus vir die mense gesê: “Ek is die lig vir die wêreld. Wie My volg, sal nooit in die duisternis lewe nie, maar sal die lig hê wat lewe gee.”