Category Archives: Liefde

Psalm 74:17 U wat al die seisoene van die aarde vasgestel het; somer en winter is die werk van u hand.

Die eerste woorde van ‘n ou volksliedjie, “dis heerlike lente, die winter’s verby”, kom in my op toe ek hierdie nuwe, nuutgebore skoonhede sien. Alhoewel daar ‘n yskoue windjie om my waai, het hierdie asemrowende amandelbloeisels hul boodskap baie duidelik in blommetaal gebring. Hulle is die eerste bome wat hul lentegewaad vertoon en so die nuwe lente aankondig, asof hul sê: kyk, sien, hier is die nuwe seisoen, hier is die bewys daarvan!

Hoop jy geniet hulle net soveel as wat ek dit geniet om hulle na jou te bring.

Littekens

die dor boom
het in die volheid van tyd
deurweek van die nuwe seisoen
in volle bloei gestaan . . .
nuwe lewe het deurgebreek, aangebreek

Gebed: Dankie Here, dat ons kan glo: daar is altyd ‘n nuwe lente, ‘n nuwe lewe, wat na ‘n winter aanbreek, in die natuur en ook in ons lewens.

Lukas 12:27 ”Kyk na die veldblomme – hoe hulle groei! Hulle swoeg nie en hulle spin nie. Maar Ek sê vir julle, selfs Salomo in al sy prag was nie soos een van hulle geklee nie.

Die skoonheid van die perdeblomme  (dandelions) een oggend vroeg, so met die dou daarop, het my diep aangeraak.

Dou is soveel keer in die Bybel ‘n simbool van Sy seën en sorg. ‘n Paar skrifgedeeltes: Genesis 27:28 – God gee aan jou dou uit die hemel, Numeri 11:9 – Die manna het snags saam met die dou by die kamp geval., Deut 33:13 Mag sy land deur die Here geseën word: met die beste uit die hemel, met dou.

Doublom

perdeblom, o veldblom
geen swoeg, geen sweet
swierig, in spierwit gekleed
met bruidsjuweel getooi:
skitterend, glansryk die kraalwerk
U handewerk
veelvoudig die seën, trou:
die blomsorg, hemelse dou

ons, so sorg-gevul
terwyl U sorgvuldig sorg

Luke 12:28 (MSG) If God gives such attention to the wildflowers, most of them never even seen, don’t you think he’ll attend to you, take pride in you, do his best for you?

Fil 1:20b-21 Ek wil ook nou, soos nog altyd, met alle vrymoedigheid deur my hele wese Christus verheerlik in lewe en in sterwe, want om te lewe, is vir my Christus, en om te sterwe, is vir my wins.

Die afgelope week het ek soveel Perdeblomme, wat ons as Dandelions ken, raakgesien. Ek het my aan hulle verkyk en hulle skoonheid het my verstom. Later het ek hul van naderby leer ken op Google. Dit is ‘n wonderlike plant met soveel voedingswaarde én genesende eienskappe! Hier het ek in my onkunde gedink dis sommer ‘n onkruid.

Ek sien toe hierdie op YouTube en deel dit graag:

Dit het my diep aangeraak . . .

Gesaaides

geel, vrolike sonblom
liggevulde, helder lewe . . .
maar toe die toevou
die donkerte, geen sien,
geen son, geen sin
die ongemak, onsekerheid
die wag, die sterf . . .

maar toe die ontvou –
spierwit oorvloed wat oopvou
in skitterende bruidsgewaad . . .

en toe eers:
die asem van die Wind
tot ‘n lewe met Hom besaai

Gebed: Heer, daar is soveel skatte elke dag reg onder ons neuse versteek. Dankie vir hierdie nederige Perdeblom se les, wees my genadig dat ek mag leef as U Perdeblommetjie.

1 Petr 1:24a Die skrif sê: “Die mens is soos gras . . .

Die afgelope week was ek, grasmens, tussen hierdie gras. Hulle het regtig maar onopvallend en vaal gelyk, maar toe die “goue uur” laatmiddag aanbreek, gebeur daar iets met hulle en ook met my . . .

Voor my oë is die vaal gras getransformeer na goue gras. Ek het net baie stil geraak en saam met die gras die Lig ervaar.

Ons graslewens is so tydelik en gewoon, maar met Sy lig word dit Goddelik. In 2 Petrus 1 lees ons dat ons deel kry aan die Goddelike natuur!

Dankie Heer, dat U lig altyd op ons, in ons, en deur ons skyn. Maak ons asseblief daarvan bewus sodat ons kan leef as U goue graskinders. So kan elke uur ‘n goue uur, elke oomblik heilig wees.

Ek wys later vir my ma die foto’s en sy sê dat dit haar herinner aan ‘n Nederlandse gedig van Nel Benschop: “Gouddraad uit vlas”. Die laaste strofe daarvan is:

Maar boven alles zou ik willen zijn Uw kind,
een Koningskind, dat glansloos vlas tot gouddraad spint.

Hosea 11:8 My liefde brand te sterk.

Die afgelope Saterdag het ek vir die dag ‘n stilteretreat bygewoon.

Buite, in die stil ure, sien ek toe die vure:

Dit het my so laat besef Hy het deur alle tye heen nog altyd Sy vurige liefde aan die mensdom bewys. Die hoogtepunt daarvan was aan die kruis en later in die vuurtonge met die uitstorting van die Heilige Gees.

Catherine van Siena het geskryf: You are the fire, nothing but a fire of love, crazy over what You have made.

Gebed: Heer, kom brand in ons harte, vul ons en elke uur van ons lewe met U heilige vuur.

So word U vurige liefdeshart oral op aarde sigbaar . . .

Ps 34:8 O taste and see that the LORD is good . . .

“Die retreatnaweek is op hande en ons is so te sê gereed vir jul aankoms. Ek moet nog net gaan kappertjies pluk vir die kamers en die verwarmers aanskakel.”

Die epos-boodskap hierbo enkele dae voor die retreat moes alreeds ‘n aanduiding gegee het van wat sou kom. . .

Alles was toe 100% gereed met ons aankoms by die Restory retreatsentrum vir ‘n fotografieretreat. Ons is met ope arms en harte verwelkom. Toe ek in my kamer kom, val my oog dadelik op die kappertjies in die blompot.  Hulle het my kamer opgevrolik met hul intense, helder kleure. Die landskap daar buite was wintervaal en die wind geniepsig koud. Die warmte van die verwarmer en die kappertjies het my dadelik so welkom, so tuis, laat voel.

Die volgende oggend kry ons die opdrag om iets te gaan afneem, of liewer, te gaan sit en te ontvang wat na ons toe kom, dan ‘n foto daarvan te neem.

Toe ek in my kamer kom om my kamera te kry, val my oog weer op die vrolike kappertjies in die blompot. Ek kyk lank en stil daarna en besef dis wat ek nou ontvang: ek ervaar Sy goedheid, Sy sorg, in hulle. Die lens skuif tussen my en hulle in en hul dieper skoonheid word vasgevang, gestoor in my kamera asook in my.

Met middagete sit ek een van die kappertjieblomme uit die slaai op my bord. Bewustelik, stil het ek daarna gekyk, dit geëet en die bevestiging dat Hy goed is, selfs op my tong gevoel. . . Die kappertjieblom het my laat sien en laat proe dat Hy goed is!

Gebed: Heer, laat ons asseblief kappertjiekleur en -warmte in ‘n koue, harde en soms ongenaakbare wêreld bring.

Later sien ek die sonnetjie en sy strale op die kapperblaar en ek weet dat Hy ons uitnooi om Sý lig uit te straal net daar waar ons is en só dalk iemand se winter ophelder . . .

Hierdie boom-mens-kyk oefening raak maar net nie vir my afgesaag nie . . .

Dit word vir my al duideliker dat dit vir Jesus baie belangrik is dat ons reg moet sien:

In Matt 6:22b-23 lees ons: Jou oë is soos ’n lig. As jy op die regte manier daarmee kyk, maak dit alles in jou lewe helder. Maar as jy jou oë nie deur God laat instel nie, maak jou oë jou hele lewe pikdonker. As daar geen goddelike lig in jou lewe skyn nie, is dit regtig nag binne-in jou.

Verder ook sê Jesus: Matt 7:1 “Moenie oordeel nie” en verder in Matt 7:5 “Huigelaar! Haal eers die balk uit jou eie oog uit, dan sal jy goed kan sien om die splinter uit jou broer se oog uit te haal.”, het vir my ‘n dieper, ryker betekenis.

In die Markus 8 word beskryf hoe Jesus ‘n blinde man genees, maar in twee stappe. Die man sien eers mense, iets soos bome.

Dit is ‘n gedeeltelike sien, hierdie boom-mens-sien, maar Jesus wil ons ten volle laat sien. Daarna genees Jesus hom heeltemal en hy alles toe duidelik gesien.

Gebed: Jesus, U het gesê dat as ons oog goed is, sal ons hele liggaam lig hê. Genees asseblief ons swaksiende oë soos net U kan. Dan sal ons lig sien, lig wees. . . Dan sal ons nie mense regsien nie, maar reg sien!