1 Petr 1: 3 Ons prys die God en Vader van ons Here Jesus Christus, God wat baie goed is vir ons. Jesus Christus het gesterf, maar God het vir Jesus weer laat lewe, en so het God vir ons ook weer laat lewe. Ons het nou ’n nuwe lewe, en daarom kan ons baie seker wees van die dinge wat ons hoop.
So ‘n rukkie gelede het ek ‘n wurm gewaar waar hy teen my studeerkamervenster teen so ‘n slakkepas, of moet ek eerder sê “wurmpas”, teen swaartekrag opgebeur het.
Ek het gesien hoe hy homself stadig en doelgerig begin toespin…
Ons was weg met vakansie en toe ons terugkom, sien ek wat gebeur het en neem dadelik toe my kamera om die verhaal te deel.
Daar was nou ‘n skoenlapper teen die venster! Hy was pragtig (veral as ek teruggedink het aan die vroeëre wurmvoorkoms). Dink net hoe donker dit binne die kokon was, hoe beperkend, hoe benoud… Toe, op ‘n dag, op die regte tyd, bars die nuwe lewe daaruit!
Dit is ‘n simbool van ons opstanding, ons wat in Hom glo, eendag en ook nou.
Hy het vir so ‘n dag of wat verbete aan die buitekant van die kokon vasgeklou. Ek wonder of hy homself dalk in die weerkaatsing van die glas gesien het en nie sy oë kon glo oor die metamorfose nie! Of nou vlieg my verbeelding te ver, skoenlappers kan seker nie sover sien of dink nie… Hy het bly wag en klou totdat sy vlerke sterk genoeg was en het voor my oë na vryheid gevlieg! Wat ‘n gesig was dit nie!
Iemand het eenkeer gesê: “the tomb becomes the womb”. Nuwe lewe kom altyd uit die donkerste plekke…
Later besef ek dat wanneer ek in my kokon, in die donkerte is, is Hy besig om my te omvorm om my meer soos Hy te maak. Dis daar waar Hy ons volle aandag het, waar ons die sagte klei in Sy hande kan wees. Hy wil ons ook van ons egoïsme stroop. Al wat ons net moet doen is om ja te sê vir Hom, net soos Hy eens in die tuin van Getsemane gedoen het met: “nie My wil nie, maar U wil”. My neiging is gewoonlik om myself jammer te kry en te wonder waarom Hy dan so ver van my voel en al die tyd was Hy só naby my. So jammer ek besef dit gewoonlik eers heelwat later…
Ek kyk na die leë kokon en weet dat daar nog baie van my is wat moet sterf …
Gebed: Here, help my in die tye wat dit lyk asof alles om my donker, dood is, asof U ver weg is. Herinner my asseblief daaraan dat daar altyd ‘n opstanding na ‘n nuwe, groter en vryer lewe na elke dood is. U laat altyd alles ten goede meewerk. U weet wat die beste vir elkeen van ons is. Amen